«Հրապարակ». Ծառուկյանի հավատավոր զինակիցները նեղվել են իրենց նկատմամբ նման «անարդար» վերաբերմունքից

«Հրապարակ» թերթը գրում է. «Երբ լուրեր տարածվեցին, որ Գագիկ Ծառուկյանը մտադիր է նոր ցուցակով մասնակցել հաջորդ ընտրություններին, որտեղ չի լինի հին գվարդիան՝ ԲՀԿ-ի կարկառուններ Նաիրա Զոհրաբյանը, Գեւորգ Պետրոսյանը, Միքայել Մելքումյանը, դրանից հետո սկսեցին համառ լուրեր շրջանառվել, որ նշված երեք պատգամավորները հնարավոր է լքեն ԲՀԿ խմբակցությունը։

Ծառուկյանի հավատավոր զինակիցները նեղվել են իրենց նկատմամբ նման «անարդար» վերաբերմունքից։ Հնարավո՞ր է նման բան․ երեկ հարցրինք Նաիրա Զոհրաբյանին։ Նա ասաց․ «Ինձ զարմացնում է, որ տարբեր քաղաքական ուժեր, անձինք, երկրի համար կարեւորագույն օրակարգերը մոռացած, զբաղված են Նաիրա Զոհրաբյանի անձով։ Ի հիասթափություն շատ-շատերի, Գագիկ Ծառուկյանի հետ իմ հարաբերությունները հրաշալի են, ո՛չ աշխատանքային, ո՛չ մարդկային խնդիր չկա։ Եվ ես ԲՀԿ խմբակցությունից դուրս գալու մտադրություն եւ ցանկություն չունեմ»։

Ինչ վերաբերում է հաջորդ ԱԺ «ցուցակին», Զոհրաբյանն ասաց, որ դրա մասին խոսելը դեռ վաղ է, եւ իր համար հիմա առավել կարեւոր խնդիրներ կան՝ ռազմագերիների, անհետ կորածների եւ Արցախում հումանիտար ճգնաժամի խնդիրը․ «Այս խնդիրներով ես, ի դեպ, դիմել եմ հումանիտար տարբեր կազմակերպությունների եւ երկուշաբթի Պետդումայի հրավերով կլինեմ Մոսկվայում, կունենամ տարբեր հանդիպումներ, որոնց օրակարգում է լինելու ռազմագերիների խնդիրը։ Իսկ նրանց, ում հետեւողականորեն հանգիստ չի տալիս իմ անձը, եւ փորձում են իմ շուրջ արհեստական աղմուկ եւ սենսացիա փնտրել, խորհուրդ կտամ սառը հյութ խմել՝ իմ անձի հանդեպ անհասկանալի բարդույթներից եւ կախվածություններից ազատվելու համար»։

Առավել մանրամասն՝ թերթի այսօրվա համարում

Վերջին գրառումները

Ընտրացանկ